LEMBRANDO A XOÁN FARIAS

 "A veces me pregunto si no deberíamos sentarnos en la cuneta, tirar la toalla, meter toda nuestra experiencia en un baúl, tirar el baúl al río y dejar que los niños improvisen una sociedad nueva..."

                                                                                       Salamanca, febrero de 1997

  Con esta frase de Xoán Farias queremos renderlle unha póstuma homenaxe ao escritor nado en Serantes no ano 1935, falecido o pasado 10 de xuño en Villaviciosa de Odón.

  As súas obras caracterízanse por un estilo elaborado e conciso, de gran precisión e alleo aos recursos retóricos. Moitas delas están ambientadas no mundo rural e amosan un compromiso político.

  Destaca na súa produción literaria xuvenil, que comeza a partires do 1977, entre outros títulos:

. "Algunos niños, tres perros y más cosas". 1980.

. "El Niño que vino con el Viento". 1986.

. "A la Sombra del Maestro". 1995.

. "La Infancia de Martín Piñeiro". 1998.

. "El Paso de los Días". 2000.

  Recibiu entre outros premios:

. Premios de Bronce e Humor do Festival de Montreux. 1973.

. Premio Nacional de Literatura Infantil y Juvenil. 1980.

.Premio Iberoamericano de Literatura Infantil y Juvenil. 2005.

  Nos últimos anos da súa vida puido disfrutar da ledicia de ver na súa cidade natal e, en concreto, na súa parroquia de Serantes unha biblioteca escolar que leva o seu nome.

 A nosa biblioteca ten unha ampla selección de obras  de Xoán Farias que podedes consultar:

- Un tiesto lleno de lápices ( ilustrado por Emilio Urberuaga): o protagonista, un rapaz de 10 anos, para quen ser escritor é un xogo de inverno. Cando chove e non se pode saír, escribe nun caderno sobre a súa realidade cotiá.

- Ismael, que fue marinero: Ismael é un vello mariñeiro xa retirado que vive dos seus recordos de alta mar...

- La fortuna de Ulises: A través da figura dun emigrante, o autor achéganos ao complicado mundo dos negocios e do diñeiro, para chegar á conclusión de que nin o diñeiro nin o poder poden substituír as máis elementais necesidades do ser humano: a amizade, a bondade, o amor...

- A la sombra del maestro: á sombra dun carballo de cen anos, o autor chega  a saber da vida do seu arredor, un pícaro, unha moza namorada...

- Os Corredoiras:  a historia da familia Corredoiras, que viven nunha vila preto do mar e cuxo pai, Andrés é pescador.

- A infancia de Martiño Piñeiro: na vida de Martiño nunca sucede nada extraordinario, non obstante cada xornada prodúcese o milagre de vivir..

- A pousada do sétimo día: tódolos 25 de xullo, se o ano é Xacobeo, aparece nun claro do bosque a taberna do Suso. Él, a súa muller e mais un neto parvo pasaron a ser ánimas en pena desde que un día, hai xa moitos anos, deron mal trato a uns pobres que ían en peregrinación.

Animádevos e collédeos como lectura, seguro que vos van encantar... 

MANUEL RIVAS, FINALISTA NA SEMANA NEGRA DE XIXÓN

 A Semana Negra de Xixón, que se celebra entre o 22 e o 31 de xullo, acaba de dar a coñecer os finalistas dos pemios que concede. Entre eles hai dous autores galegos: Cristina Sánchez-Andrade, que opta ao galardón Espartaco á mellor novela histórica pola súa obra Los escarpines de Cristina de Noruega,  e Manuel Rivas, finalista ao Hamlet de novela negra por Todo é silencio . Podedes botarlle unha ollada ao primeiro capítulo da obra de Rivas aquí.

Sorte aos autores galegos. 

 

UNHA RECOMENDACIÓN MUSICAL

Desde a biblioteca queremos facervos unha recomendación musical para este verán. O veterano grupo DOA vén de facer no seu novo disco unha homenaxe á literatura galego-portuguesa medieval, na que recrean cantigas de amor, amigo, escarnio e maldizer con instrumentos tradicionais ( zanfona, xafón...) cunha visión actual. Nel atoparedes cantigas de autores como Afonso X, Pero Meogo, Joan García de Guilhade, Martín Códax, Meendinho... Ademais, o disco está acompañado do traballo fotográfico de Xoán Piñón, marabilloso... O libreto contén, para alén, un estudo crítico-literario das cantigas galego-portuguesas realizado polo profesor Federico Pérez e unha fermosa introdución da poeta Eva Veiga.
Como anticipo, podedes botarlle unha ollada a este vídeo que recolle unha das súas interpretacións.

Lois Pereiro e a internet

Desde estas páxinas virtuais non esquecemos que o pasado 17 de maio, ademais de celebrarmos o Día das Letras, celebrouse tamén o Día da Internet e o Día Mundial das Telecomunicacións e da Sociedade da Información.

Sen dúbida, o innovador Lois Pereiro sería hoxe en día un internauta máis. El, que participou no mundo audiovisual como tradutor de series como Kung Fu, ou Dallas; que  colaborou en publicacións alternativas como Trilateral ou Das Capital; cinéfilo explícito en moitos dos seus poemas; ensarillador de versos e artes plásticas e música pop-rock con influxos punk; el, madia leva, tiraríalles bo partido ás posibilidades que a  arañeira nos ofrece para a normalización da nosa lingua e para a difusión e creación cultural no noso país.

E nós, botamos man da rede para seguir presentándovos materias sobre o homenaxeado. Na sección NOVAS da páxina do instituto tedes a ollada particular que o Equipo de Dinamización da Lingua Galega do IES As Mariñas de Betanzos e mais o noso argallaron conxuntamente para vós en formato boletín.

Lembrade que os tedes de balde na biblioteca.

RECURSOS DIDÁCTICOS PARA COÑECER MELLOR A LOIS PEREIRO

Como sabedes este ano o Día das Letras Galegas está adicado á figura de Lois Pereiro. Para achegarnos máis a este escritor a Coordinadora Galega dos Equipos de Normalización e Dinamización Lingüística publica na súa páxina web algúns recursos para traballar a súa obra literaria. Na devandita páxina podedes atopar información bibliográfica, ligazóns e tamén actividades realizadas nos centros de ensino. Igualmente interesantes son as seccións videoteca ( Antón Lopo, Xosé Manuel Pereiro, Manuel Rivas, Arturo Casas dan a súa visión sobre o poeta) e fonoteca, nesta última podemos escoitar o propio Lois Pereiro recitando algún dos seus poemas (está o recital que deu no pub Moka da Coruña en 1996).

PUBLICADA A PRIMEIRA ANTOLOXÍA EN GALEGO DOS CONTOS XITANOS

A editorial Positivas publica a primeira antoloxía en galego dos contos xitanos, un conxunto de textos traducidos do romanés por Onofre Sabaté. É a primeira vez que se traduce ao galego, dun xeito amplo, a creación fabuladora xitana, unha fonte habitualmente oral que en Galicia carece dun reflexo escrito. Hai contos de Eslovaquia, Estados Unidos, Francia, Nova Zelanda, India...

Os fillos do vento é unha escolma de contos tradicionais xitanos. Esta escolla só tenta mostrar o talento de contadores do pobo xitano, e a súa intensa e variada literatura oral, espallada polas máis diversas culturas e por múltiples territorios. E hai certos contos que se poderían incluír no patrimonio oral de moitos outros pobos, sendo o exemplo máis claro O barqueiro xitano. Porque hai un fondo común de moitas narrativas e porque o pobo xitano sempre libou de todas as culturas.A escolma desta edición ten como protagonista case sempre ao pobo xitano, e a súa historia, a perfección e superioridade da raza, a intolerancia da que son vítimas, as profesións, a música, a antipatía polo traballo e o parezo pola liberdade ou o antimilitarismo, a hospitalidade...[Contracapa do libro]

Podedes ler aquí a nova completa. 

A PRAIA DOS AFOGADOS

A praia dos afogados, a exitosa novela de Domingo Villar vén de ser traducida ao inglés co título Death on a Galician shore. Ollos de auga, a primeira da serie, tamén ten versión inglesa.

O noso Leo Caldas traspasa fronteiras...

Podedes ler a noticia enteira aquí.

UNHA NOVA NOVELA PARA FRANK SOUTELO

O detective creado por Miguel Anxo Fernández regresa cunha nova novela Lume de cobiza. Coñecemos o detective Soutelo   pola serie de novelas detectivescas que o autor iniciou en 2002 con Un nicho para Marilyn, Un lugar no inferno e Tres disparos e dous friames (que os nosos alumnos de terceiro deberían coñecer e que está dispoñible na biblioteca ). A diferenza fundamental coas outras novelas da serie é que esta vez Frank Soutelo deixa Los Ángeles para resolver o seu primeiro caso en Galicia. A novela estará nas librarías o próximo mes de abril da man da editorial Galaxia.

Se vos gustou Tres disparos e dous friames, seguro que vos a gustar estoutra nova novela.

REEDICIÓN DE "O MISTERIO DAS BADALADAS"

Hai xa vinte e cinco anos que Xabier P. Docampo publicara O misterio das badaladas, unha das primeiras novelas de misterio da literatura galega e o primeiro dos seus libros e que acadou un grande éxito dentro da literatura infantil e xuvenil. Agora vén de saír unha nova edición con ilustracións de Xosé Cobas e revisada polo autor.

Recomendámosvos a lectura deste libro, que trata aos lectores como persoas intelixentes non importa cal sexa a súa idade.

O argumento é este: no campanario da igrexa de Eiranova acaban de instalar un reloxo. Comezan a soar por primeira vez as badaladas que anunciarán a todos os habitantes que son as doce da noite. Unha, dúas, tres..., dez, once... Entón sucede algo que haberá dar nun acontecemento que só cinco rapaces resoltos e afoutados quererán pescudar até encontrar explicación para un fenómeno que a todos confunde. Unha por unha irán resolvendo as pistas que lles van aparecendo e que os levarán a encontrar ao responsábel do anormal comportamento do reloxo de Eiranova. Mais cando isto suceda e cheguemos á última páxina do libro, abrirase un novo misterio que desafiará a perspicacia e a intelixencia do lector.

O ANO CUNQUEIRO

Este ano cúmprense cen anos do nacemento de Álvaro Cunqueiro ( Mondoñedo 1911/ Vigo 1981). Un numeroso programa de actividades homenaxea desde o pasado 28 de febreiro ata decembro ao escritor mindoniense. O calendario de actividades arrincará en Vigo e un dos retos dos organizadores é trasladar as historias do autor á rúa. Co mes de marzo chegará a Santiago unha exposición itinerante que enxalzará a figura do intelectual non só como escritor, senón como xornalista e gastrónomo. A mostra percorrerá as cidades de A Coruña, Lugo, Ferrol, Ourense, Pontevedra, Vigo.

O legado literario de Álvaro Cunqueiro abrangue todos os xéneros literarios: extraordinario poeta desde a súa xuventude, precursor do realismo máxico nas súas obras narrativas e creador dun dos textos máis importantes do teatro galego. Cunqueiro foi ademais un notable xornalista e gastrónomo.

Na nosa biblioteca podedes atopar algunhas das súas obras máis representativas:

- Tres libros de semblanzas: Escola de menciñeiros (1960), Xente de aquí e acolá (1971) e Os outros feirantes (1979). Conteñen 113 relatos de personaxes, en que se nos retrata seres populares tocados polo extraordinario, incidindo todos no proceso de mitificación do humano. Xuntos conforman o grande mosaico da Galiza popular.

- Dúas novelas que recollen personaxes da literatura universal para recrialos, humanizando o mito e engadíndolles á vez un toque de humor e poeticidade: Merlín e familia (1955) e Si o vello Sinbad volvese ás illas (1961) . Merlín... supuxo a primeira narración en galego de  Cunqueiro e ten como personaxe principal o mago Merlín que se instala coa súa raíña dona Xenebra nun ambiente plenamente galego, en terras de Miranda, na comarca de Mondoñedo. Á casa de Merlín chegan personaxes do presente e do pasado, do máis alá e do máis acá, que lle levan a consultar algún problema que a ciencia común non pode solucionar. Sinbad ... aborda a última aventura do vello mariñeiro, tamén instalado agora en terras galegas.

- As crónicas do sochantre (1956) é a súa segunda novela e está escrita nun rexistro totalmente distinto. A obra está concibida como un xogo macabro, unha especie de pastiche humorístico das novelas góticas ou de horrores. Nárranos a estraña aventura do sochantre de Pontivy cando se dirixe a Quelven para tocar nun enterro. Na carroza que o vén recoller encóntrase con cinco personaxes,  todos eles defuntos...

- Herba de aquí ou acolá (1980), recolle a produción poética de Cunqueiro posterior a 1950, espallada en numerosas revistas, e constitúe un dos volumes que máis influíron no desenvolvemento da poesía galega contemporánea. Nel establece unha fonda reflexión sobre a identidade humana.

Animádevos e collede algún destes libros na biblioteca. Estamos seguros que Cunqueiro non vos vai defraudar.

Por último aquí tedes a última entrevista que  concedeu á TVE:

50 ANIVERSARIO DA PUBLICACIÓN DE "MEMORIAS DUN NENO LABREGO"

Eu son balbino. Un rapaz de aldea. Coma quen di, un ninguén. E ademais, pobre.

Así comeza a obra máis lida e vendida da literatura galega: Memorias dun neno galego de Xosé Neira Vilas, libro do que foron vendidos máis de 600.000 exemplares en linguas como o español, inglés, francés, alemán, ruso, búlgaro, chinés e mesmo esperanto. Convertida xa nunha obra da literatura universal, alcanza  a trixésimo primeira edición da man da editorial Galaxia que, con motivo do cincuenta aniversario da súa publicación, vai sacar unha edición especial  que conta coas ilustracións de  Xaquín Marín. Ademais o autor, director e actor  Cándido Pazó estrea unha adaptación teatral desta novela e da que haberá unha xira que arrincará o 4 de febreiro na Estrada logo da súa representación no Salón Teatro de Santiago esta fin de semana. Trátase dunha interpretación híbrida entre o monólogo e o "teatro unipersoal" coa que Pazó homenaxea a obra e o seu autor co gallo deste aniversario.

DÍA DAS LETRAS GALEGAS

Como sabedes este ano o 17 de maio, Día das Letras Galegas, está adicado ao poeta Lois Pereiro. Desde este blogue queremos darlle unha pequena benvida.

Como exemplo da crudeza da súa poesía reproducimos o parágrafo dun dos seus célebres poemas e que serviu de epitafio gravado en pedra na súa tumba en Santa Cristina de Viso:

“Cuspídeme enriba cando pasedes por diante do lugar onde eu repouse, enviándome unha húmida mensaxe de vida e de furia necesaria"

UNHA NOVA AVENTURA PARA LEO CALDAS

A Voz de Galicia publica hoxe na súa sección de cultura unha nova sobre un dos nosos detectives favoritos, Leo Caldas, o protagonista de Ollos de auga e A praia dos afogados. Domingo Villar está a preparar a que sería a terceira entrega da serie para o próximo Nadal. Ademais xa  están adaptando a segunda das entregas ao cinema, o autor pensa no actor Luís Tosar como a persoa idónea para encarnar ao detective. Que pensades vós?

Se queredes ler a noticia completa, premede aquí.

A PRAIA DOS AFOGADOS. Domingo Villar

 Domingo Villar naceu en Vigo en 1971. Trasladouse a Madrid, onde vive actualmente. Traballou como guionista de cine e televisión. Foi crítico gastronómico e actualmente fala de literatura no programa de radio  Asuntos Propios.

A súa primeira novela, Ollos de auga, obtivo varios premios, entre eles o  Premio Frei Martín Sarmiento, e foi  finalista en dúas categorías dos Crime Thiller Awards en Reino Unido.

A praia dos afogados, con varias edicións, de seguro que axiña a veremos nas pantallas xa que os seus dereitos se venderon para o cinema.

Lede agora a recomendación que vos fai o voso profe de Lingua, Henrique Dacosta:

Nesta entretida e fresca novela detectivesca, o inspector Leo Caldas, un clásico xa das nosas letras, terá que resolver un enigmático e estraño caso. Un mariñeiro da vila de Panxón, ao sur da ría de Vigo, aparece morto nunha praia. Todo apunta, en aparencia, a que afogou. Non obstante, as xentes do lugar dan por feito que foi un suicidio. O cadáver, atado cunhas bridas plásticas aos pulsos, fai sospeitar ao inspector Caldas cousa ben distinta. Aí dará inicio a investigación, pragada de múltiples voltas e xiros até desembocar na descuberta final da verdade. Ao longo da narración plásmanse excelentes ambientes mariñeiros e populares. Así mesmo, os momentos hilarantes e cheos dunha enorme retranca acerca da nosa forma de ser, son outros dos aspectos a destacar, ademais das reflexións sobre a soidade, sobre o amor e o desamor, e que paso a paso, nunha lectura áxil e chea de intriga, van trazando toda a pescuda policial até a resolución final do caso.

Gozade coa lectura.