ROTEIRO LITERARIO POR CELANOVA

Que mellor maneira de celebrar a semana das Letras que visitar a fermosa terra de Curros e Celso Emilio Ferreiro? Alá marchou o alumnado de segundo xunto co dos clubs de lectura para coñecer os seus monumentos, os restos do poboado celta  de Castromao e, como non, os versos máis emblemáticos dos ilustres poetas.
Xa formamos parte do mapa da casa dos poetas da Fundación Curros e a rapazada tivo ocasión de amosar os seus dotes musicais acompañando coa frauta o concerto de órgano de Marisol Mendive.

CLUB DE POESÍA CHEGA A PRIMAVERA CON SABINA

Damos a benvida ao mes das flores con esta canción de Joaquín Sabina, para o toque moderno, pero non queremos esquecer un clásico da nosa terra da autoría de Curros:

O MAIO

Aí vén o maio

de frores cuberto ...

Puxéronse á porta

cantándome os nenos;

i os puchos furados

pra min estendendo,

pedíronme crocas

dos meus castiñeiros.

Pasai, rapaciños,

calados e quedos;

que o que é polo de hoxe

que darvos non teño.

Eu sonvos o probe

do pobo gallego:

pra min non hai maio,

pra min sempre é inverno! ...

Cando eu me atopare

de donos liberto

i o pan non me quiten

trabucos e préstemos,

e como os do abade

frorezan meus eidos,

chegado habrá estonces

o maio que eu quero ...

Queredes castañas

dos meus castiñeiros? ...

Cantádeme un maio

sin bruxas nin demos;

un maio sin segas,

usuras nin preitos,

sin quintas, nin portas,

nin foros, nin cregos.

Manuel Curros Enríquez, Aires da miña terra