FEIRA DO LIBRO SOLIDARIA

 

O 27 de abril celebramos a Feira do libro solidaria. Contamos coa colaboración dos colexios adscritos, CEIP Plurilingüe San Xoán de Filgueira e CEIP de Pazos, para desenvolver unha xornada chea de actividades. Os fondos obtidos na feira servirán para axudar á Cociña Económica de Ferrol, como xa vén sendo costume.

En primeiro lugar, tivemos unha conversa-recital con Antía Otero, que nos axudou a achegarnos á poesía.

Logo desenvolvemos un Obradoiro de cadros vivintes sobre a temática anual da biblioteca: as emocións. E vaia se se emocionou a rapazada coa actividade! Aquí tedes a mostra:

Por último, tivemos tempo para xogos e merenda e para rematar a xornada visitando a Feira.

Unha xornada estupenda!

O ENTROIDO DAS EMOCIÓNS

Un ano máis todo o centro se sumou á temática da biblioteca para encher de emocións o centro. O profesorado e persoal non docente escolleu a ledicia do circo e o alumnado dividiuse entre Inside-Out, Felices anos 20, os mimos...

 

XINCANA DE NADAL: ENIGMAS EMOCIONADOS E EMOCIONANTES

 Volvemos celebrar con moito éxito a tradicional xincana de Nadal, na que colabora todo o centro.

Desde o equipo de biblioteca, a nosa achega consistiu nunha proba de descifrado de enigmas encriptados co código Cenit Polar.

Os enigmas a descifrar, por suposto, eran citas relacionadas coa nosa temática anual: as emocións.

Aquí vedes o entusiasmo co que desenvolveron a proba:

Así de fermoso quedou o panel final, con todos os enigmas descifrados. Non hai código que se lle resista ao noso alumnado!!!

PROXECTO COMPETENCIAL 1º ESO

 As emocións son o eixo deste Proxecto Competencial artellado en colaboración co Departamento de Orientación do centro. 

Partirase do traballo dos sentimentos e as manifestacións de emocións a partir dun obradoiro de emoticonos que servirán de marco ao póster do corredor central, para chegar finalmente a desenvolver a temática máis concreta do acoso escolar. 

O obxectivo é dar visibilidade a temas que adoitamos esquecer: o sufrimento doutros, a falta de empatía, os problemas de saúde mental...

EXPOSICIÓN "AS EMOCIÓNS E A ARTE"

 A nosa compañeira do equipo de biblioteca Emilia Saavedra Seijo, en colaboración co alumnado de 1º e 2º, deu forma á exposición anual, neste caso sobre a temática das emocións.

A exposición tivo tanto éxito que decidimos colocala de xeito permanente decorando o Salón de Actos.

COMO VESTIMOS ESTE ANO A GATA CATA?

 

Estas foron as imaxes premiadas. Falamos de emocións e o equipo de biblioteca está moi satisfeito de ver que vos decantastes por aquelas máis positivas: o amor, a ledicia, o poder da imaxinación... Á vista está o trunfo das cores alegres!!

COMEZAMOS NOVO CURSO

 Un curso máis, aínda que con algo de retraso, comezamos as actividades da Biblioteca. O retraso débese ás obras de mellora que se están facendo no IES de Catabois e que tamén afectan á biblioteca. Agora temos un espazo máis amplo e máis luminoso.

Queda aínda moito por facer pero o equipo de biblioteca está cargado de ilusión e tamén hai moito alumnado colaborador e moi boa participación nos clubs de lectura. Así que nos agarda un ano moi intenso.

Animádevos e vide facer equipo!

Este ano, tal como reza o lema exposto no corredor principal, a temática serán as emocións, así que le e emociónate!!