viernes, junio 26, 2009

XVª EDICIÓN DE "PONTE... NAS ONDAS!"



Por cuarto ano consecutivo, o IES Catabois de Ferrol, o noso centro, vén de participar do proxecto "Ponte... nas ondas!". E é que unha vez máis, e tentando ser coherentes co espírito con que o proxecto naceu, quixemos pór o noso graíño de area, nesta ocasión cunha gravación que ten a ver cun dos valores máis importantes do noso patrimonio inmaterial, tal é o caso do Camiño de Santo André.
Así pois, a posta en valor do carácter lingüístico, social, antropolóxico, arqueolóxico, lendario..., alén de tantos outros que atesouran o noso patrimonio común galego-portugués, vuise de novo refrendado coa aposta de toda unha serie de centros educativos de Galiza e Portugal, mais tamén doutros países, ben máis afastados, da América do Sur (Colombia, Chile, Cuba). Porque coa idea de tender pontes, son cada vez máis as escolas dunha e doutra beira atlántica que mostran o seu interese en se querer dar a coñecer e, en consecuencia, se sumar ao proxecto.
Cando á participación do noso instituto, contarvos que arrancaba ela en 2006, ano en que faciamos un primeiro programa de radio que levaba por título "Ponte na crista... da onda!". Nel, e coa desculpa dun percorrido por Ferrol, iámonos detendo en aspectos diversos da vida laboral, social, antropolóxica... Deste xeito, desde o traballo dos estaleiros aos deportes de mar, desde a romaría de Chamorro ás lendas ligadas ao castro de Lobadiz ou da Compaña, resultaron ser o motivo da nosa narración oral.
En 2007, o título da nosa gravación radiofónica era "Unha viaxe en globo por Ferrol". Nesta ocasión, tres personaxes dialogaban, a bordo da cesta dun globo aerostático, mentres ían sobrevoando os ceos do concello de Ferrol. Desta vez, a escusa das paisaxes divisadas serviunos para facer relato de episodios, labores, elementos toponímicos, aspectos relacionados coa orografía..., tanto de hoxe como de onte.
En 2008, botabamos man outra volta dunha gravación radiofónica; por título, "A propósito da Batalla de Brión". Nesta ocasión, a narración resultaba ser de carácter monográfico. O desenvolvemento da famosa batalla acontecida no 25 de agosto de 1800, era o motivo central do noso relato, así como as explicacións dos seus antecedentes e posteriores consecuencias.
E por fin chegamos hoxe a este ano 2009. Apuntarmos, sen dúbida, a novidade de que o formato da nosa gravación veu experimentar un salto tanto cualitativo como cuantitativo. Porque, por primeira vez, atrevémonos a facer un vídeo. O seu título , "Navegando en barcas de pedra". O fío condutor, o Camiño de Santo André de Teixido. O repaso aos dous itinerarios principais desde Ferrol, un máis costeiro e outro máis interior. Así pois, novamente os elementos de carácter antropolóxico, lendario, arqueolóxico, ancestral voltaron a ser os principais argumentos do noso discurso, mais desta vez apoiado coa forza das imaxes. Voz, música e imaxes, tanto en movemento como estáticas, conformaron a nosa gravación. O punto de partida, o mito das barcas petrificadas, común el a tantas culturas atlánticas de Europa.
En resumo, pois, e como colofón á nosa breve historia trasfronteiriza, só nos resta por dicir que vos animedes a visitar a preciosa páxina web de "Ponte... nas ondas!". O interese de carácter xeral acerca do inmenso e importante traballo que a organización leva desenvolvendo ano tras ano, xa de por si paga a pena. Mais queremos tamén aproveitar a oportunidade de vos recomendar que vexades o vídeo da nosa participación como IES Catabois de Ferrol nesta XVª edición, fornecida a través da propia páxina web. Mesmo cabe a posibilidade de escoitardes a gravación do ano pasado!
Así pois, e desexando que sigades o noso consello, entrade xa sen demora en www.pontenasondas.org
Tan simple e por ser de xustiza... porque é de noso!

No hay comentarios: