CLUB DE LECTURA DE ADULTOS

O pasado martes 5 de marzo, reunímonos algúns dos integrantes do Club de Lectura de Adultos para intercambiar as nosas visións desta obra de Shakespeare, Las alegres comadres de Windsor. Non puidemos contar coa presencia de Mónica, moderadora e fotógrafa oficial das sesións nin, por motivos de saúde, con María, Chus e Carmela, ás que lles desexamos que se recuperen axiña e acudan o vindeiro martes 9 de abril.
Comentamos a importancia que teñen os personaxes femininos nas obras cómicas de Shakespeare e un aspecto que gustou a todas as lectoras da obra foi a lección que as esposas dan tanto ao bribón Falstaff coma aos seus maridos celosos e malpensados. Aurora salientou a gran difusión que acadaron as obras deste autor ata os nosos días e a súa influencia no cine. Pilar relacionou esta idea coa obra Cartas a Julieta de Lise e Ceil Friedman, que recolle o costume depositar cartas de amor no muros da casa de Verona onde a tradición sitúa a casa de Julieta; a novela fíxose película en 2010 dirixida por Gary Winick e protagonizada por Amanda Seyfried, Vanessa Redgrave e Gael Garcia Bernal, entre outros.
Para rematar, Ana lamentou que as ausencias das compañeiras impedisen levar a cabo a lectura dramatizada dun fragmento da obra que María e Pilar propuxeran na sesión anterior, xa que segundo ela, as pezas teatrais son para ver, oír e sentir.